Busturialdeko Hitza

Bermeoko Atunsa enpresarentzat lan egiten zuen arrantzale bat hil zen atzo, Indiako Ozeanoan. Ontzian itsasoan lanean zela gertatu zen ezbeharra, herenegun. Atunsa enpresako arduradunek baieztatu egin dute arrantzalea itsasoan hil zela, eta «antza denez, bihotzekoak jota» hil zela. «Heriotza naturala izan da, eta edonon gerta» zitekeela gaineratu dute. Galiziakoa zen zendutako arrantzalea, eta enpresako arduradunek ez dute haren adinaren berri eman nahi izan.

LAB sindikatuak urtebetean arrantzan ari dela bihotzekoak jota hiltzen den bigarren arrantzalea dela nabarmendu gura izan du. «Duela urtebete, hain zuzen, ondarrutar bat hil zen; hura ere bihotzekoak jota».
Enpresek beraien interes ekonomikoei besterik ez dietela begiratzen salatu du LABek, eta langileen osasunaz ez direla kezkatzen. «Kasu horietan enpresek itsasontzietarako medikuak kontratatuko balituzte, halakoak gertatuz gero, momentuan artatu ahal izango lituzkete».
Espainiako Gobernua ere kritikatu du LABeko Arrantza arduradunak. «Zergatik ez du bidaltzen halako lekuetara ontzietako arrantzaleei osasun zerbitzua eskainiko dien itsasontzi bat?».
Herenegun zendutakoa kontuan hartuta, Indiako Ozeanoan lanean zela urtebeteko epean hiltzen den hirugarren arrantzalea da. Izan ere, iaz bihotzekoak jota hildako arrantzaleaz gain, joan den ekainean ere beste arrantzale bat hil zen itsasoan.
Bermeoko Impesca enpresarentzat egiten zuen lan, eta ezbeharra gertatu zenean `Txori Urdin´ itsasontzian zegoen lanean.