Busturialdeko Hitza

Azkenean konfirmatu da: Aztik iragan martxoan aurkitu zuen itsasontzia ez da Bou Nabarra. Hala baieztatu du Eusko Jaurlaritzak Kresala Urpeko Taldeak egindako txostena oinarri hartuta.

Aztik iragan martxoan aurkitu zuen ontzi bat Matxitxako lurmuturraren inguruan eta Bou Nabarra izan zitekeela uste zuten.

Kresala elkartea ikerketa zentroarekin harremanetan jarri zen eta bere zerbitzua eskaini zion ontzia aztertu eta Bou Nabarra zen ala ez ebazteko.

Jabi Atutxa urpekari talde honetako presidentearen arabera, ordea, Aztik, «segurtasun neurriak» argudiatuta, atzerriko enpresa bati egin nahi zion ikerketa honen proiektua aurrera eramateko eskaintza.

Kresala elkarteak, bere aldetik, ontzia bilatzeari ekin zion, «Aztik erakutsitako irudiak» jarraituta, izan ere, horietan kostaldeko lerroa ikus zitekeen, «eta horrekin eta zonda baten laguntzarekin» aurkitu egin zuten.

Merkantzia ontzi bat da

Aurkitutakoa «barruan burdina zeraman merkantzia-ontzi bat» dela agertu du Atutxak. Ez dakite, ordea, zein izan daitekeen, izan ere, «Bizkaiko Labe Garaietako eta bestelako konpainietako desagertutako ontziak» begiratu dituzte, baina horiek aurkitu dutena baino handiagoak dira. Dena den, Euskal Herrikoa dela uste dute. Lehen Mundu Gerran era horretako ontzi ugari ibiltzen omen ziren Ingalaterrara eta Baionara.

Aztirekin batera lau urte zeramatzan elkarlanean Kresala Urpeko taldeak Eusko Jaurlaritzak eskatuta itsaspean dauden gauzei buruzko lehen inbentarioa egiten. Aurkitutako ontziari buruzko txostena, bestalde, asteartean eman zion Aztiri eta honek Jaurlaritzari. Azken honek konfirmatu zuen ontzia ez zela Bou Nabarra.

Nola jakin ez dela Bou Nabarra

Itsaso azpian, 100 metro baino gehiagora hondoratuta dagoen ontzia Bou Nabarra ez dela ziurtatzeko nahikoa argudio badituztela agertu du Jabi Atutxak. Batetik, «burdin-minerala duelako barruan» eta, bestetik, «egitura» desberdina duelako.

Hain zuzen, «Bou Nabarrak ez zuen branka-gaztelua deritzona».

Bestalde, «kanila zegoen tokiaren neurria 14 metrokoa zen, planoaren arabera, eta, honek, asko jota, zortzi metro ditu».

Horrez gain, Atutxaren esanetan, ontziko elementu horren gainean beste egitura handi bat dauka eta hor ezinezkoa da kainoi bat joatea».