Busturialdeko Hitza

Ekonomia ›› «Arrantzaleen bizia ez dute arriskuan jarri gura», Atzerri Ministerioak Gotzon Klemosen emazteari esan dionez.

«Arrantzaleen bizia ez dute arriskuan jarri gura, eta horregatik ezer egin baino lehen bahituak aske uztea gura dute». Hori da Mireia Arrien `Playa de Bakio´ ontzian bahituta dagoen Gotzon Klemos gernikarraren emazteari atzo Atzerri Ministeriotik esan ziotena. Arrienen esanetan, «ez dute jardungo harik eta arrantzaleak aske utzi arte».

Era berean, Miguel Angel Moratinos Atzerri ministroak atzo zenbait komunikabidetan «zuhurtzia eta tentuz jokatzea» eskatu zuen, egiten ari diren operazioak ez oztopatzearren. Moratinosen arabera, Nicolas Martin Cinto Espainiak Kenyan duen enbaxadoreari emandako jarraibideak «bizitzarik arriskatu gabe» arrantzaleen askatasuna erraztea da lehentasuna.

Hain zuzen, Espainiak Kenyan duen enbaxadorea atzo goizean Muqdisho Somaliako hiriburuan izan zen, bertako agintari eta lehen ministroarekin harremanetan jartzeko, eta domekatik bahituta dauden marinelak ahalik eta arinen askatzeko «prozesua arintzeko».

Klemosen emazteak jakinarazi duenez, Atzerri Ministeriotik egunero deitzen diote gertatzen ari denaren berri izateko. «Niri esan didatenez, oraindik ez dute dirurik ez ezer eskatu».

«Ez dute itsasontzitik irten»
Zenbait komunikabidek arrantzaleak jada lehorrean direla kaleratu duten arren, Arrienen arabera, «ez dute itsasontzitik irten, hori da behintzat ministeritzatik niri esan didatena».
Bestalde, Espainiak bidali zuen `Mendez-Nuñez´ armadako fragata heldu barik zegoen atzo, egunkari hau ixterako orduan.