Busturialdeko Hitza

Elhuyar Fundazioak antolatutako VI. Zernola Olinpiadako 2. saria Eleizalde ikastolako DBHko lehen mailako A eta B ikasgeletako ikasleentzat joan da. Zientziarekiko zaletasuna piztea, eta horrez gain, talde-lana eta sormena sustatzea, eta, medioa kontuan hartuta, teknologia berrien trebetasuna hartzea helburu duen olinpiada horretan bigarren sarituak izan dira Eleizaldekoak, 41 ikasgelaren artetik. Zientziari eta teknologiari lotutako hainbat lan burutu dituzte, esaterako, 2008. urtea patataren nazioarteko urtea izanik, horren inguruko lan bat egin behar izan dute. Guztira, zazpi lan aurkeztu behar izan dituzte, urrian hasi eta maiatza bitartean. Lanetan originaltasuna eskatzen zieten.
Eleizaldeko hogei bat ikaslek parte hartu dute sakonean olinpiada horretan, nahiz eta bidean noizean behin beste gelakide batzuk ere aritu izan diren.
Hileroko proba hoberenarentzat ere sariak izan dira, baina sari nagusiak pasa den asteburuan banatu zituzten. Eleizalde ikastolako ikasleek Plentziako aterpetxean bi eguneko egonaldia izango dute, egonaldia kirola praktikatzeko aprobetxatuz.